Johan Veenstra
Stellingwarver schriever en verteller

Adres onbekend

Plaetst op 20 november 2022.

Pieter Jonker en ik weren vandemiddag te heuren in et radiopergramme Adres onbekend van kro-ncrv op Radio 5 van 12 tot 2 ure. Et pergramme wodt prissenteerd deur Ron Kas en Amy-Lee de Boer. In et pergramme vertelde Rob van der Pas uut Rotterdam dat hi’j op zuuk is naor zien zuster Els. Van zien oolden wet hi’j ok haost niks. Hi’j is grootbrocht in een pleeggezin. Mar ja, Pieter en ik hebben de moeder van Rob lange jaoren goed kend, we weren hiel goed mit heur en heur man bevrund. Tot heur wegraeken in 1995 en doe biwwe ok in de kunde kommen mit Els. Ik hebbe nog een foto uut de tachtiger jaoren daor Rob zien moeder op staot, ze zit naost mien moeder en ik stao ok op die foto. Die foto he’k naor de maekers van et pergramme maild zodat Rob zien moeder vandemiddag zien kon. En Pieter en ik zatten dus tillefonisch in de uutzending. Rob zal mit oons beidend kontakt opnemen.

Nao de radiouutzending bin ‘k drekt in de auto stapt en naor De Wiek reden. Daor he’k vandemiddag op vesite west bi’j Frits en Ria. Ria is in dit geval de bekende Drentse dichteresse Ria Westerhuis. Ze hebben vleden jaor bi’j mi’j west, dit was dus een tegenbezuuk. Et was hiel gezellig, de mond het oons gien mement stillestaon. Ria het in 2017 et eerste exemplaor in ontvangst neumen van mien dichtbundel De overkaant van et waeter en ik hebbe vandemeitied et eerste exemplaor in ontvangst neumen van heur dichtbundel Dwaalstroom. Zoks schept een baand! Doe ‘k weer thuus kwam, weren d’r mailties van meensken uut Franeker en De Lemmer mit de tiedinge dat ze me heurd hadden op ‘e radio. En… dat ze me in et Nederlaans praoten heurd hadden. Dat hadden ze nog nooit eerder heurd. Now, dat gebeurt ok haost nooit.