Abel Darwinkel

Vandemiddag he’k op vesite west bi’j mien aachterneve en iemker Piet an de Heirweg in Wolvege. We hebben genoeglik een ure bi’jpraot en ik bin mit tien potten hunning weer op huus an gaon. Bloemehunning en pompoenehunning. Ik bruke vaeke hunning, ok deur de thee. En rechtstreeks van de iemker is et et alderlekkerste.

Vandaege veur een weke he’k et al even anstipt in dit dagboek: Abel Darwinkel stopt nao vuuf jaor as direkteur van de Stellingwarver Schrieversronte. Dat vien ik slimme spietig, ik raeke een goeie en betrokken uutgever kwiet. In zien tied as direkteur bin mien laeste twie boeken uutkommen: Et liek in de Lende en Naozoemerlaand. Die beide boeken bin prachtig uutgeven in een hadde baand. Ik zie me nog tiedens de Eupen Stal van 2021 in de hal van et gebouw van de Schrieversronte zitten om boeken te verkopen. De thriller Et liek in de Lende was doe krek uutkommen en et boek verkocht geweldig. Iedere keer as Abel even beneden kwam, vreug hi’j hoevule a’k d’r die dag al verkocht hadde. Ik vun et mooi dat hi’j zo mitleefde en bedaanke him hier alvast veur de hiele plezierige saemenwarking in die vuuf jaor! Et is te begriepen dat d’r niet tientallen solsetaanten klaorstonnen om zien plak in te nemen. Abel zien opvolger wodt Arjan Sterken, een jongkerel van 33 jaor. Arjan het studeerd an de Radboud Universiteit in Nijmegen en is opgruuid mit de tael van Ommen. We bin vleden weke al even mit him in de kunde kommen. Abel nemt vandaege over een weke ofscheid as direkteur en dan kan alleman mit Arjan in de kunde kommen.