Aalten (2)

Ik was gistermorgen om twintig over elven in Aalten bi’j Jan en Diana. Daor ston al lekker erebeiegebak klaor! Tussen de middag hewwe daor brood en sop had. Heur beide zeunen Leon en Raymond kwammen ok te eten. Dat was gezellig. Omdat et gien mooi fietsweer was, hewwe middags mit de auto op pad west. In Dinxperlo hewwe et Greenslaandmuseum en et kleinste karkien van Nederlaand bekeken. Dat museum gaot over et smokkelen dat daor in vroeger tieden een protte veurkwam. Bi’j bakkeri’je Van de Dobbelsteen hewwe wat drinken had mit een lekker gebakkien d’r bi’j. De heufdvestiging van die bakkeri’je is in Aalten. De winkel daore wodde indertied eupend deur… Mien Dobbelsteen! We hebben ok een mooie autotocht maekt deur et glooiende Montferlaand, Zeddam en ’s Heerenbarg. En doe deur een stokkien Duutslaand naor Elten. En weer naor Nederlaand naor Lobith-Tolkaemer daor aj’ prachtig over de Rijn uutkieken kunnen. Meester Andringa vertelde op ‘e legere schoele dat de Batavieren hier in uutholde boomstammen oons laand inkwammen… Now veerden d’r hiele grote holle boomstammen! We hebben aovens eten in resteraant Mondriaan in Winterswiek. Hiel lekker! Hieronder een foto van vlak veurdawwe eten zullen. Ik bin over kwat over achte vanuut Aalten op huus an gaon en was om tien ure weer thuus. Ik vule hiel goed da’k de laeste tied (weer) te vule huj op ‘e vörke neumen hebbe. Ik zal morgen naor de dokter toe. Et komt zo niet goed, dat is een ding dat zeker is.