8.288,40 euro

Ik bin an et aende van de morgen over De Hoeve naor de snackbar bi’j de Koepelbos in Berkoop fietst en daor he’k een brotien kroket opsmikkeld. Vervolgens wa’k even veur ien ure in et gebouw van de Stellingwarver Schrieversronte. Mar d’r kwammen daor gien Eupen Stal-bezukers en boekekopers meer. Pieter kwam d’r wel. We zatten in de hal op oonze vaaste plakken van de laeste maond en hebben daor ofrekend mit direkteur Abel van de Schrieversronte. Pieter, Fettje en ik hebben in de dattig daegen van de Eupen Stal daor veur 8.288,40 euro verkocht. Dat hadde nog meer wezen kund awwe gien hittegolf over de huud kregen hadden. Mar me donkt dat de besturen van Schrieversronte en Nobilis meer as tevreden over oons wezen kunnen!

Ik haele aachternichte Ria uut Papendrecht in de naomiddag van de trein in Wolvege. Ze blift hier de rest van de weke. Ze hadde eins pas op donderdag kommen zuld en dan zowwe vri’jdag tegere naor de opera an de Scheene in Ni’jtriene. Mar bi’j de Spoorwegen beginnen ze morgen te staeken, dat daoromme komt ze twie daegen eerder. Aanders was ze vermoedelik argens onderweg hopeloos vaaste kommen te zitten. We kriegen hier vanaovend een simpel maol waarm eten. Gratineerde eerpelties mit grune boonties en een runderwossien en dan nog wat lekkers van de Zuvelhoeve nao. Poes Marja zal wel wonder opkieken dat d’r hier dommiet ok zomar een vrouw ommescharrelt…