600

Gisteraovend het Jarmo van Computerservice Hofma uut Wolvege hier nog even west. Hi’j het et antiviruspergramme van de laptop verlengd. Van komputer en laptop he’k een pepier van him kregen daor boven staot Herstelsleutel voor BitLocker-stationsversleuteling. Ik hebbe begrepen dat d’r van alles misgaon kan en dan moe’k dit hebben. En veerder begriep ik d’r niks van en bin ‘k slimme bliede dat hi’j goed allat is en me bescharmt veur komputerongemakken.

Ik hebbe vandaege mien 600^ste kollum naor de Liwwadder Kraante stuurd. De aldereerste ston in de kraante op 24 feberwaori 2001. De 600^ste kollum hiet Feest en gaot over de eupening van et ni’je onderkommen van mien uutgever: de Stellingwarver Schrieversronte. Et bestuur van de Schrieversronte vreug kultuurdippeteerde Eke F. om et gebouw te eupenen. Dat is de vrouw die oons krek nog veur de helte kot het op ‘e subsidie. Ie moe’n hogere wiskunde had hebben om dit bestuur te snappen.

Hieronder een foto van mien alderliefste poes Marja. As poes op disse meniere halverwege de trappe liggen gaot, is et dudelik dat hi’j mit me speulen wil. Dat is wat riskaant veur een man van mien leeftied. Halverwege de trappe… Mar dat snapt poes niet. Die wil da’k him daor lekker bi’j de huud pakke en mit him ommedondere. En dat doe ‘k dan ok, mar ik passe wel goed op.