40 miljoen

Ik las vandaege dat Jake Paul 40 miljoen verdiend het mit de boksperti’j tegen Mike Tyson die ok tientallen miljoenen kreeg. A’k zokke dingen leze, daenk ik mar ien ding: ik hebbe et verkeerde beroep keuzen. Ik doe hatstikke mien best mit de schrieveri’je en vertelderi’je in et Stellingwarfs, mar ik haele zokke bedregen gewoon niet en dat vien ik vanzels slimme spietig. Now moet Jutta Leerdam d’r vanzels wel veur zorgen dat de verkering niet uutraekt!

Ik hebbe praktisch de hiele dag in mien warkkaemer zeten. Vleden weke he’k een verhael veur De Ovend schreven mit de titel Vertellen is mooier as schrieven. Vandaege he’k weer een verhael veur etzelde tiedschrift schreven: Van filler naor ouwe stomp. Ik moet dat laeste verhael nog wel een keermennig goed deurkieken en d’r van alles an veraanderen en verbeteren. Mar now ligt d’r toch weer wat. Ik hope da’k an de haand van foto’s uut mien archief ok et volgende en dadde jaor nog verhaelen schrieven kan. Nao ankem jaor is et gebeurd.

Vanaovend gao ‘k naor ien van mien favoriete tillevisiepergrammes van dit ogenblik kieken: Krabbé zoekt Matisse. Veurige zuuktochten van Krabbé naor Kahlo, Chagall, Gaugin, Picasso en Van Gogh he’k ok zien. Ik vien dat hiel arg mooi. Jeroen Krabbé kan prachtig vertellen en hi’j nemt je al reizende en vertellende mit deur et leven van de schilders/keunsteners. En vanaovend volg ik et spoor van Henri Matisse weer!