3200

Vandemorgen he’k mit de Friese zanger Adri de Boer optreden in meziekcentrum De Rinkelbom in Et Vene. Wi’j stonnen in et locht op et grote podium van de grote geheurzael. Dan ziej’ de meensken in de zael niet zo goed. Ik kenne dat van vroeger doe ‘k mitdee an de Oranjekonserten in Wolvege. A’k eerlik bin dan stao ‘k as verteller liever dichterbi’j de meensken zoda’k ze zien kan onder et vertellen. Wat mooi trouwens dat Harry uut Noordwoolde d’r was en hi’j hadde ok nog meensken mitneumen! Zoks stel ik slim op pries! Et was vandemorgen trouwens optreden nommer 3199. En vanaovend komt optreden nommer 3200. Et is al een jaormennig leden da’k twie optredens op iene dag hadde. Ik blieve vanaovend nog dichterbi’j huus as vandemorgen. Ik mag in Zaandhuzen vertellen op naturistecamping De Appelhof. Daor bin meensken uut hiel Nederlaand en dat vien ik wel een uutdaeging. Ik zal zo dudelik meugelik praoten en vertellen!
Hieronder nog een foto van de flamingo’s die ‘k gister in de Orchidenenhoeve in Luttelgeest maekt hebbe. Wat bin dat toch prachtige, sierlike voegels en wat wo’n die vaeke op ‘e foto zet!