3.300

Vleden weke wa’k even bi’j Vewo Media in Wolvege om pasfoto’s maeken te laoten veur et ni’je riebewies. Mar dat kon over een peer weken nog wel, zee de man daor. Mien oolde riebewies was ommes nog tot 1 december geldig. Ik kreeg een fooldertien mit hoe as et online allemaole hiel makkelik kon. Dan was et in een peer daegen klaor. Ik hebbe dat fooldertien thuus es bekeken en kreeg sebiet boekzeerte van et idee wa’k online allegeer regelen mos. En ik bin op een leeftied da’k gien boekzeerte van zok gedoe hebben wil. Ik hebbe vandemorgen pasfoto’s maeken laoten en daor gao ‘k gewoon mit naor et gemientehuus en dan komt et ok wel klaor. Dan duurt et een dag of wat langer, mar wat maekt dat now toch uut.

Vanaovend he’k dus mien 3.300-ste optreden. Ik mag verhaelen en gedichten vertellen en veurlezen in de biebeltheek van et mooie Drentse dörp Diever daor we zoemers wel es deurfietsen en op een terras zitten. Ik stappe aanst mit groot genoegen in de auto, ik hebbe d’r wel nocht an. Ik hope nog altied da’k de 3.333 volmaeken kan. Dat liekt me een mooi getal. Mar dan moe’k et platte van de voeten nog wel een schoffien onderholen.