25 jaor!

Mit een bod makkeroni op ‘e schoot he’k vandemiddag keken naor de huldiging van oonze Olympische helden. En daornao he’k mezels mar fielseteerd. Ik daenke niet dat d’r ok mar iene an docht het of d’r arg in hebben zal, mar et is vandaege op ‘e kop of 25 jaor leden dat mien eerste kollum in de Liwwadder Kraante ston. Dat was dus op 24 feberwaori 2001. De titel van et stokkien was Droom en et gong over burgemeester Remco Heite die een peer weken leden uut de tied raekt is. Ik schreef die kollums eerst tegere mit Karst Berkenbosch en die Stellingwarver rebriek  hadde doe ok een vaaste titel: Klunderen. Karst dee et de iene weke en ikke de aandere weke. Laeter bin ‘k  allienig deurgaon, ok om de aandere weke. Mooi wark. Ik hadde nooit docht da’k d’r zolange mit deurgaon zol. De kommende donderdag stuur ik kollum nommer 635 naor de kraante. Ik kan niet op et alderlaeste mement nog wat schrieven, ik moet rejaol de tied hebben, aanders raek ik in de stress. Ik hebbe ok altied wat stokkies in veurraod. As et es even niet wil, ik gien nocht hebbe of da’k me niet lekker vule, dan is d’r wel altied een kollum. In wezen bin ‘k d’r aenlik altied wel mit doende, want bi’j alles wa’k zie, heure en mitmaeke… Altied vraog ik me of as d’r ok een kollum in zit. Ik hope nog even deurgaon te kunnen, mar et mag dudelik wezen da’k dit niet nog hiel arg lange meer doen zal. En wie volgt me dan op?

Ik hebbe now al in zeuven ammarillen knoppen zitten. In drieje van die zeuven zitten twie knoppen! Dat is krek zovule as vleden jaor. Zeuven van de elf is mooi, mar twie jaor leden was et elf van de elf. Mar d’r bin een peer bi’j daor komt nog wel wat blad an, mar d’r zitten haost gien wottels meer an. En dan is et gebeurd. Krek zoas et mit ooldere meensken gaot. Nog wel wat blad, mar haost gien wottels meer.