25 jaor laeter

We bin now 25 jaor laeter… Ik hadde argens henne west te vertellen en ree op ‘e weg van Koudum naor Balk doe ‘k de radio anzette. D’r was aanders gien praot as de vliegtugen die de Twin Towers invleugen. Ien ding was doe drekt wel zeker. De wereld zol d’r niet veiliger op wodden.

Anke het hier vandaege et huus schonemaekt, now kan ik morgen mien vesite in een schoon en net huus ontvangen. Ik bin in de auto naor fysiosport west. Et is een toer om Wolvege in te kommen. Now de op- en ofritten van de snelweg naor Der Izzerd ofsleuten binnen en ze doende binnen mit de tunnel onder et spoor is Om den Noord ok ofsleuten. Alles moet dus de Lycklamaweg langes. Alle grote vrachtwaegens ok. Ik hebbe d’r vandemorgen lange over daon. Weeromme naor huus toe bin ‘k een aende ommereden. Over Ni’jlaemer, Ni’jhooltwoolde en Der Izzerd. Dat ree vlot deur. Now ja, op Der Izzerd zat een koppeltien enten midden op ‘e diek, mar die gongen rustig, zonder heur drok te maeken, veur me an de kaant.

Gister kwam d’r een kaorte van Harmen en Jacob. Die weren op vekaansie in Groet. De foto is van et Klimduun in Schoorl. We bin d’r meerdere keren bi’jlanges fietst. Ie kun daor mooi fietsen, mar et is d’r altied slimme drok.