Johan Veenstra
Stellingwarver schriever en verteller

Internetdagboek


File

Plaetst op 27 feberwaori 2024.

Gisteraovend wa’k in oons mfc bi’j et geweldig goeie Nijkoor. Ze oefenen daor altied. Et Nijkoor zingt op 25 meert bi’j de uutreiking van de H.J. Bergveldpries in de karke van Berkoop, een pat van de Winterreise  van Schubert die ik zoe’n twintig jaor leden vertaeld hebbe in et Stellingwarfs. De Drentse schriever Anne Doornbos vertelt dan  een mederne Winterreise en ik leze verschillende lieden veur. Omdat d’r een protte niet-Stellingwarvers in et koor zitten, heb ik gisteraovend wat verteld over de zwaorigheden bi’j et zingen. En dan veural om de woorden mit een en-uutgang zoas et woord leven. Meerstal wodt et zongen as in et Nederlaans. Dat mag bi’j al die woorden vanzels niet. Awwe praoten slikken we de en-uutgang in, dat moet bi’j et zingen ok. Dat kan hiel goed en nao wat oefenen gong et gisteraovend prima.

Vandemiddag he’k eerst de belastingpepieren naor mien administraosiekantoor in Wolvege brocht en doe bin ‘k naor Sneek gaon. Gerda viert daor vandaege heur verjaordag en dat he’k mitvierd. Weeromme naor huus raekte ‘k zokrek in een kilemeters lange file, dat ik hadde mar liefst een ure en tien menuten wark en komme van Sneek naor huus.


Vraogteken

Plaetst op 26 feberwaori 2024.

Gistermiddag wodde ‘k in de Aldi in Wolvege staonde hullen deur een man die vreug a’k him nog wel kende. Hoevaeke as me zoks toch overkomt! Ik wus et vanzels niet. Hoe zal ik dat toch altied ok weten? De man zee dat hi’j jaoren leden mit me praot hadde doe ik mit boeken in Berkoop ston. Dat kan waor wezen. En neffens de man, die Stellingwarfs praotte en een vrouw bi’j him hadde die deurleup, zol ik doe zegd hebben: ‘As ik jow zie, zie ik ien groot vraogteken.’ Ik kan me waorlik niet herinneren da’k ooit zoks tegen wie dan ok mar zegd hebbe. Zonder him bekend te maeken is de man doe veerderlopen. Et blift zodoende dus ien groot vraogteken.

Ik bin vandaege uut aende zet mit et rippeteren van de verhaelen die ‘k de kommende zundagmiddag in Staveren vertellen zal. En now he’k mien verstruperspakkien krek antrokken, want ik zal vanaovend naor oons mfc De Ni’je Stienze om daor de leden van een zangkoor les te geven in et goed praoten en zingen in et Stellingwarfs. De zunne gong hier zokrek trouwens wondermooi onder. De locht in et westen was hielemaole oranje. Prachtig!


Willem IV

Plaetst op 25 feberwaori 2024.

Ik hebbe et boek Willem IV, Stadhouder in roerige tijden (1711-1751) van Fred Jagtenberg lezen. Een biografie van mar liefst 968 bladzieden. Willem IV was een zeune van de Friese stadhoolder Johan Willem Friso en Maria Louise van Hessen-Kassel. We kennen heur hier beter as Marijke Mui. Johan Willem Friso verdronk as jongkerel in et Hollaans Diep. Maria Louise wodde regentesse veur heur zeuntien en dat dee ze goed. Ze zat d’r algedurig aachteran dat Willem stadhoolder wodden kon in meer as allienig Frieslaand en Grunningen. Mar de Hollaanse regenten wollen eerst niks van Oranje weten. Ze hullen de macht liever zels en verdielden onder mekeer de baenties die flink wat centen opleverden. Uuteindelik reddede de regentekliek et niet op. Willem wodde stadhoolder in alle Nederlaanse perveensies. En zo vertrok de stadhoolder vanuut Liwwadden naor Den Haag. Maria Louise bleef in Liwwadden wonen. Willem trouwde mit Anna van Hannover, de dochter van de Engelse keuning George II. Et was een goed huwelik. Willem en Anna weren gek op mekeer. Dat bliekt uut alle brieven die ze mekeer schreven. Wat schreven die meensken een brieven! Dat is mooi, want daoromme weten we now een protte. Al die appies en mailties van vandaege-de-dag blieven niet beweerd. Willem hadde en zwakke gezondhied. As joongien was hi’j uut een raem valen en daordeur hadde hi’j een bochel. Mar hi’j was vaeke ok nogal langdurig ziek. Hi’j hadde verschrikkelik vule wark deur alle onderlinge ruzies van bestuurders en et volk dat daor tegen in opstaand kwam. En wat kostte et een muuite en krieg de titel Preens van Oranje. Et lokte Willem om et stadhoolderschop arfelik te kriegen in mannelike en vrouwelike lijn. Willem IV raekte weg doe hi’j nog mar 40 jaor oold was. Zien zeuntien, de laetere stadhoolder Willem V, was doe nog mar een jaor of drieje. Een grote slag veur Anna en Maria Louise. En zo wodde d’r weer een vrouw regentesse veur een toekomstige stadhoolder. Een mooi boek!


Belastingangifte

Plaetst op 24 feberwaori 2024.

Vandaege he’k doende west mit de belastingangifte. Een vervelend jaorliks klussien. Vroeger vulde ‘k die zels op pepier in. Via de komputer he’k dat ien keer perbeerd en doe he’k hiele malle woorden deur et huus raosd. Dat was dus ien keer en nooit weer. Joop van administraosiekantoor Veenstra (gien femilie) uut Wolvege dot mien angifte now al jaoren. Mar ik maeke alles wel klaor en telle ok alles al op en zo. En dan he’k best nog wel een ure of wat wark, want ik hebbe een protte kleine en grotere inkomsten en ok een protte kleine en grotere oftrekbere kosten. En omda’k gien deune knieperd bin he’k ok nogal wat giften. Mar now ligt alles gelokkig weer klaor.

As Douwe en Romkje d’r es een peer daegen op uut weren kree’k vaeke een ansichtkaorte van heur toestuurd. Mar ja, ik leve now ok in de mederne tied en hebbe een smartphone. Zodoende kree’k een appien van heur mit een stokmennig foto’s toestuurd. Zo kan et ok. Ze zatten een midweke in Ringelstein in de Duutse dielstaot Noordrijn-Westfalen. Ze stuurden me ok een foto van heur onderkommen daor. Et oolde stesjonsgebouw van et plakkien.


Amarillen

Plaetst op 23 feberwaori 2024.

Ik hebbe now in tiene van mien elf amarillen een knoppe zitten en in iene van die tiene zitten twie knoppen. Vleden jaor kree’k ze alle elf weer in de bluui. Et is nog even ofwaachten as me dat now weer lokt.  Misschien wil die iene dit jaor niet. Et is in ieder geval geweldig. Wat ok geweldig is, is dat now al haost 68.000 meensken de Aleksej Navalny-petitie tekend hebben. Ik zie ok geregeld Russische naemen. Russen die dus in Nederlaand wonen en niks van Poetin hebben moeten. Ik zag zels dat een vrouw uut Kazan ondertekend hadde. Kazan is een stad an de Wolga. Is dat niet wat riskaant? Of is dit een grappemaeker? Ik hebbe ok zien dat verscheiden meensken uut de Stellingwarven de petitie ondertekend hebben. Een man uut Zaltbommel schreef d’r bi’j: Fuck Putin! Zie: https://aleksejnavalnyweg.petities.nl

Keuningsdag wodt van ’t jaor in Emmen vierd mit de keuninklike femilie d’r bi’j. Bi’j et Drentse Boek hebben ze now, hiel toepasselik, een hieleboel verschillende t-shirts te koop  Hieronder staot d’r iene. Dikke smok veur de keuning.


Podcast

Plaetst op 22 feberwaori 2024.

Ik bin de hiele dag op ‘e vlieg west. Vandemorgen om goed negen ure wa’k al in de radiostudio van Odrie in Oosterwoolde. Daor wodde ‘k een ure laank interviewd deur Elizabeth Bergsma over mien schrieveri’je en vertelderi’je. Mien wark veur en in et Stellingwarfs, hoe a’k schrieve, waor a’k mien idenen weghaele en nog een hieleboel aandere dingen. In dat ure is d’r drie keer een stokkien meziek dri’jd. Et interview wodt uutzunnen as radiopergramme en et komt ok as podcast beschikber. Die komt ok op dit webstee te staon. Ik bin trouwens iene uut een lange riegel volk. Elizabeth gaot ok mit tal van aandere meensken praoten. Ik vien dawwe hiel genoeglik praot hebben. Zi’j hadde van alles te vraogen en ik kon genoeg vertellen en dan is een ure zomar omme. Technikus Andries Oppersma het van teveuren een foto van oons maekt en die foto staot onderan dit dagboekstokkien. Nao et interview he’k thuus gauw wat eten en doe bin ‘k naor Haarm en Jacob in Et Vene west. Haarm hobbelt now al 73 jaor een aentien aachter mi’j an deur et leven. Laot dat nog mar een schoffien zo blieven. We hebben heerlike happies had, dat ik hebbe vanaovend thuus mar ien plakkien bolle behaffeld.


Petitie Aleksej Navalny

Plaetst op 21 feberwaori 2024.

Gisteraovend he’k de Petitie Aleksej Navalny tekend. In de petitie wodt de gemiente Den Haag vraogd om de straote daor de Russische ambassade an staot een aandere naeme te geven. De ambassade ligt now an de Andries Bickerweg en dat moet dus de Aleksej Navalnyweg wodden. Doe ik tekende zag ik dat krek ok meensken uut Langedieke en Sunnege tekend hadden. En doe ‘k zokrek keek zag ik meensken uut Berkoop en Oosterwoolde. Mit mekeer hebben al 43.000 meensken de petitie tekend. Doe dat ok, volk! As de straote die naeme krigt wo’n de Russen van de ambassade hier elke dag herinnerd an de man die op bevel van diktater Poetin vermoord wodde. Kiek op https://aleksejnavalnyweg.petities.nl

Vandemiddag moch ik in Bolsward verhaelen vertellen veur de leden van PCOB/KBO in gebouw Centrum naost de Gaasthuuskarke an de Gaasthuussingel. Ik kreeg daor een protte vlocht op ‘e kooi. De zael zat hatstikke vol. Et vertellen gong prima, ik hadde goed rippeteerd. Ik was al es twie keer eerder bi’j de PCOB west, dat was in 1998 en 2003. De laeste keer is dus al 20 jaor leden. We hebben ofpraot da’k over 20 jaor weer naor Bolsward zal. Verscheiden meensken scheuten me an en vertelden dat ze geneuten hadden van de kollum Chippendales die gister in de kraante ston. Ik kreeg daor ok twie hiele biezundere mailties over uut Sneek. Hieronder een foto die ‘k vandemiddag maekt hebbe. Et is altied somber weer, dus nooit mooi fotoweer. Dit is de Gaasthuuskarke, d’r naost is gebouw Centrum. Hier was ik vandemiddag dus.


Couperus

Plaetst op 20 feberwaori 2024.

Vandemorgen he’k naor de Schrieversronte in Berkoop west om daor de boeken henne te brengen die ‘k vleden zaoterdag in Beetsterzwaog niet verkocht hebbe. Vandemiddag he’k een druppelbrille besteld bi’j de apteek in Wolvege veur a’k de ogen druppelen moet nao de beide opperaosies. Ik hebbe ok even mit de brilleman overlegd wanneer die ien van de brilleglaezen d’r eventueel uuthaelen gaot. En et gedicht daor a’k et gister over hadde is goedkeurd! Dat is hiel mooi! Jim heuren wel es een keer waor as dat komt te staon.

Ik hebbe ‘Mijn Couperus’ van Paul Schnabel lezen. Et betreft hier et Couperus Cahier XIX dat uutgeven wodde deur et Louis Couperus Genootschop. Vleden jaor was et 100 jaor leden dat Couperus wegraekte. Paul Schnabel was de direkteur van et Sociaol en Kultureel Planburo. De veurganger van Kim Putters die now geweerwodden moet wat een extraparlementair kammenet percies is. Dat is me toch ok wat… Louis Couperus was ien van oonze grootste schrievers. Bekend bin grif nog wel de tillevisieseries van De boeken der kleine zielen mit o.a. Ellen Vogel, Eric Schneider en Caro van Eyck. En De stille kracht mit Willem Nijholt en Pleuni Touw. Dat weren indertied prachtige series. Paul Schnabel is eupenlik homoseksueel. Louis Couperus was dat ok, mar dat kon en moch doe nog niet zegd wodden. Couperus trouwde daoromme keurig mit Elisabeth Baud, mar ze hadden appatte slaopkaemers. Dat het heur grif slim begroot. Veerder konnen ze best akkederen, ze hadden dezelde interesses. Schnabel geft al lezende in et wark van Couperus zien visie op ‘e saemenleving van vandaege-de-dag. Mooi om te lezen! Hieronder een bekende foto van Couperus die in 1917 maekt wodde deur M. Goldsmid. Disse foto staot veur op et Cahier. Couperus was zo te zien een echte dandy.


Gedicht

Plaetst op 19 feberwaori 2024.

Drie weken leden kree’k via de Afûk in Liwwadden van twie opdrachtgevers een verzuuk om een gedicht te schrieven. As et goedkeurd wodt komt dat op een hiel mooi plak in de Stellingwarven op een bod te staon. An et aende van april mo’k et opstuurd hebben. Mar ik hebbe et vandaege al opstuurd. De titel is Naozoemerlaand wodden, dezelde titel die mien laeste verhaelebundel het. In verbaand mit de kommende staaropperaosies wark ik alderhaande dingen van teveuren of. En as et gedicht niet goedkeurd wodt hebben ze nog rejaol tied en vraog iene aanders. Ik hebbe vandaege verhaelen rippeteerd en twie kollums schreven. Daor wark ik ok mit in veuren. Ik zorge d’r veur da’k veur die opperaosies een stokmennig kollums kaant en klaor liggen hebbe, zoda’k die allienig nog mar naor de kraante hoef te sturen. Ik hebbe zodoende gister ok al een verhael veur et aprilnommer van et Stellingwarver tiedschrift De Ovend naor de Schrieversronte stuurd. Dat verhael gaot d’r over dat me ooit een optreden beloofd is veur preenses Margriet in museum De Buytenplaats in Eelde. Dat is trouwens nooit wat wodden. En… dan he’k de laeste weken ok nog drie langere verhaelen schreven. Daor vertel ik laeter wel over. D’r is zodoende altied zat wark om te doen.


De Oosterstreek

Plaetst op 18 feberwaori 2024.

Et was gister een bar drokke dag. Naoda’k de hiele dag mit boeken op ‘e hobbymark in Beetsterzwaog staon hadde, he’k me thuus gauw wat eten klaormaekt, ik hebbe aandere kleren antrokken en poes een stokmennig aaien geven. Doe bin ‘k weer in de auto stapt en naor De Oosterstreek reden. Aovens een klein tippien in de auto rieden durf ik nog wel an. Ik moch daor vertellen veur een groepien van zoe’n twintig senioren. Et was een hiele genoeglike aovend en ik hebbe d’r flink wat boeken verkocht. Mien uutgever kan tevreden wezen. Nao ofloop bin ‘k daor nog an de advekaot raekt en hebbe gezellig wat naopraot mit de Oosterstrekers. Et was al nao elf ure doe ‘k thuus was en doe he’k nog even naor de wereldkampioenschoppen hadrieden keken. Wat een geweldige prestaosie van Irene Schouten. D’r henneknoffelen en toch nog wereldkampioen wodden. Geweldig! Ik kan nooit drekt op bedde gaon nao een optreden, want dan doe ‘k gien oge dichte. Vandaege bin ‘k votdaolik begonnen mit et rippeteren van verhaelen veur et optreden van ankem weke woensdagmiddag. Dan ma’k naor de mooie stad Bolsward te vertellen.


« Veurige bladziede   Volgende bladziede »