Johan Veenstra
Stellingwarver schriever en verteller

Internetdagboek


Droom

Plaetst op 17 oktober 2026.

Ik hebbe al vaeke schreven da’k mit grote riegelmaot aekelik drome. Ok nogal es da’k weer warken en leren moet. Vreselik. Mar vannaacht was et hielemaole niet vreselik. Ik was mit kammeraod Haarm weer op schoele of op een kursus. Wat percies is me niet echt dudelik wodden. D’r weren nog twie studenten en we weren allemaole in de twintig. Iene van die beide aanderen biddede zo now en dan even. Dat mos van Allah. We weren dus mar mit ’n vierend en konnen ommeraek akkederen. We hadden les van mar iene juffer die van Krikke hiette. Et was slim interessaant en ik maekte allegeer antekenings. En die juffer Krikke praotte zo now en dan ok gewoon Stellingwarfs tegen oons. Daor hadden pattie lerers van de ulo in Wolvege vroeger nog wat van opstikken kund. De Stellingwarver lerers he’k al die jaoren deur nooit ok mar ien woord Stellingwarfs praoten heurd. Mar es zien wa’k vannaacht weer beleve.

Vandemiddag he’k tussen de bujjen deur op ‘e fiets naor aachterneve en iemker Piet an de Heirweg in Wolvege west. Ik hebbe weer acht potten hunning ophaeld, hebbe d’r een peer bakkies drinken had en we hebben genoeglik een schoffien praot. Vandemorgen kwam d’r een kaorte van Sieger en Geertje uut de Harz. Die weren daor een midweke op vekaansie. Zo te zien is de Harz magic. Now, dat is dan fabelhaft.


Poepende aolscholvers

Plaetst op 16 oktober 2026.

Ik bin vandemorgen op ‘e fiets naor fysiosport in Wolvege west. Et is nog altied heerlik zaacht en mooi fietsweer. Nao de fysio he’k een bakkien thee dronken bi’j Jarmo en zien moeder. Dat kostte me niks. Wel wat aanders as eregister in Bataviastad. Daor kostte me een koppien thee 3,95 euro. Een glas hiet waeter en een theezakkien. Schaandelik! Dan reken ik altied nog even weeromme in guldens. Dat kostte me dus haost negen gulden. Aj’ 25 jaor leden zegd hadden dat over 25 jaor een koppien thee negen gulden kosten zol… Dan zoj’  grif docht hebben dat et een staepelgekke en geveerlike wereld wodden zol. En dat is et ok wodden. Nao een kruudkoeke en een ontbijtkoeke he’k vandemiddag een vierkaante botterkoeke bakt. Ik hadde een vierkaante bakvorm van Anke kregen en die he’k dus drekt bruukt.

Ik hebbe verschillende mooie reakties kregen op mien kollum in de kraante van vleden deensdag. De kollum gong over de opstaand van alle aandere dieren tegen et roofdier dat meenske hiet en dat de aandere dieren almar minder leefruumte gunt en geft. Hier iene mooie mar in wezen treurige reaktie van een vrouw: Ik wil je laten weten dat jouw column een verhaal naar mijn hart is. Ik woon aan het water met een steiger voor de deur en nu alle boten weer verdwenen zijn kunnen de vogels, waaronder de aalscholver, lekker hun plek weer innemen op de steiger en hem kleuren met hun witte ontlasting. Je begrijpt dat vele medebewoners van ons appartement hier boos over worden, ze willen niet dat ze geconfronteerd worden met poepende vogels. Ik vind dat de vogels daar alle recht toe hebben, zij waren hier het eerst. Ik bin et vanzels hielemaole mit disse vrouw iens. Mien moeder zol zegd hebben: aj’ gek wodden komt et je in de kop an. En daor is alles mit zegd.


Daarmonderzuuk

Plaetst op 15 oktober 2026.

Ik hebbe vandaege veur de zoveulste keer een daarmonderzuuk had. Ik was vannaacht/vandemorgen om twintig over drieje al wakker en bin d’r om half vufe ofgaon en om vuuf ure weer begonnen mit vieze troep op te drinken. Jan uut Wolvege was hier vandemorgen om goed kwat over achte en die het me naor et ziekenhuus brocht. Mien daank is groot. Zuster Renate uut Wolvege praot daor altied Stellingwarfs tegen me. Ik zat mit heur vader Piet op ‘e ulo. Ik praote daor trouwens tegen iederiene Stellingwarfs. We moe’n oonze tael heuren laoten! Kom op! Zuster Janine die me d’r een infuus indrokte en me op alderhaande mesienen ansleut zee da’k een mooie en fleurige onderbroek an hadde. Dat was dus een Muchachomalo-onderbroek die ‘k een peer jaor leden in Bataviastad kocht hebbe. Zoks zal niet tegen je zegd wodden aj’ van die flutterige onderbroeken van de Hema an hebben! Zuster Alie die op ‘e behaandelkaemer warkte zee dat ze van De Haule kwam en dat ze mien kammeraod Pieter Jonker goed kende. En doe kwam de dokter en wa’k zomar inienend van de wereld. Een schoft laeter wa’k op een aandere zael inienend weer op ‘e wereld. En doe kreeg ik een bakkien thee, een glas waeter en twie plakkies bolle. Nooit smaeken twie plakkies bolle lekkerder aj’ twintig uren gien eten had hebben. Ik vuulde me praktisch uutdreugd en verraegde van de dust. Dat is nog wel een betien zo. Haarm het me weer naor huus brocht. Mien daank is groot. De dokter belt me op 10 november. Et was van binnen mar op ien hiel klein plakkien een tikkeltien ontsteuken. Ze hebben wel een poliepien weghaeld, dat gebeurt wel vaeker. Zoks moet even onderzocht wodden. Ik bin bliede da’k weer thuus bi’j poes bin. En die is ok bliede!


Bataviastad

Plaetst op 14 oktober 2026.

We hadden wel mooi fietsen kund vandaege mar dat hewwe niet daon. Morgen wodt et nog mooier weer, mar dan lig ik even in et ziekenhuus. We bin vandaege naor Bataviastad west. Daor gao’we geregeld henne. We kopen d’r in ieder geval altied onderbroeken. Altied van Bjorn Borg of Muchachomalo. Dit is een onthullend dagboekstokkien. Ik hadde ok nog een peer instapschoenen van Floris van Bommel kopen zuld, mar ze hadden mien maote niet meer. We hebben wat dronken in resteraant Twelve. Ik hebbe d’r niks bi’j had. Dat moch niet. Ik hebbe vandaege allienig mar wat wittebolle mit keze had. Om kwat veur drieje he’k op et parkeerterrein van Bataviastad nog twie witte bolties opeten. Nao drie ure moch ik niks meer hebben. Et zal wel morgen om een ure of half elven wodden a’k in et ziekenhuus weer wat eten mag. Ik beginne om zes ure aekelik spul in te nemen om van binnen hielemaole schone te wodden en dat moet morgenvroeg tussen vuuf en zes ure weer. Hiel vervelend. Mar ik hebbe al tussen de dattig en veertig keer een daarmonderzuuk had. De eerste keer was in 1987. Hieronder nog een foto van vandaege. De Batavia ligt now op et dreuge. D’r wodt een ni’j museum ommehenne bouwd.


Film, orchidee en koeken

Plaetst op 13 oktober 2026.

Vandaege kwam dan de uutneudiging veur de premiere van de film Sultan van Bercoop op 12 november in de Filmkarke van Hooltwoolde. Et was eerst de bedoeling dat d’r iene besleuten veurstelling wezen zol, mar daor is de karke te klein veur. D’r bin now op 12 november twie veurstellings. Iene om vuuf ure en iene om half negen. De dresskode is: feestelik. Wi’j gaon naor de veurstelling van half negen. Ik zal morgens eerst nog naor de kapper en dan za’k in de klerekaaste kieken as d’r nog een net verstruperspakkien hangt.

Op 28 september schreef ik in dit dagboek over een orchidee van mi’j die drie jaor, twie maonden en veertien daegen an ien stok deur bluuid hadde. Ik vreug me doe of a’k die ooit nog wel es weer in de bluui kriegen zol. Ja dus! Tot mien grote verbaozing zag ik dat d’r now votdaolik al weer twie staelen mit knoppen in kommen. Dat is toch wel hiel biezunder. Is dit lichtkaans wat veur et Guinness Book of Records?

Ik was een hiele tied niet an ’t bakken west. Ik kwam d’r niet an toe, maekte liever lekkere fietstochten mit al dat mooie weer. Mar mit dit malle en suterige weer van vandaege kreeg ik d’r wel weer nocht an. Dat ik hebbe vandaege een lekkere ontbijtkoeke bakt mit hunning, keneel, gemberpoeier, koriaanderpoeier en anieszaod. Een peer daegen leden ha’k al een lieke lekkere kruudkoeke bakt mit rezienen, sukade en gember. A’k naor et ziekenhuus west hebbe za’k een perzikekeek bakken.

 


De kaorties vliegen vot

Plaetst op 12 oktober 2026.

Anke het hier vandaege et huus schonemaekt en ik bin op ‘e fiets naor Wolvege west om wat bosschoppen. Et is al weer heerlik fietsweer. Veurda’k op ‘e fiets stapte he’k nog even keken en luusterd naor de toespraoke van topgeneraol Alexus Grynkewich van de NAVO. Et was dudelik. As Ruslaand oorlog wil dan kan et die kriegen. Wi’j bin d’r klaor veur. Hi’j nuumde Ruslaand niet bi’j naeme. Ik vertrouwe disse man wel, mar zien baos, Trump, veur gien halve rooie cent. Daor kuj’ niet op an. Aj’ van die kerel een twiedehaans auto kopen, kuj’ d’r wisse van wezen daj’ besodemieterd wodden.

Nog even over et dagboekstokkien  van gister. De heufdrolle in de film Sultan van Bercoop wodt vanzels speuld deur Sybren Hofstra en niet deur Siebren Hofstra. Een klein verschil, mar toch… Sybren stuurde me vandaege de trailer van de film. Wat mooi om naor te kieken! En Steven de Jong stuurde me een overzicht van de daotums van de veurstellings. De kaorties vliegen vot. Van de zes extra veurstellings bin d’r al weer haost twieje uutverkocht. Kiek zels mar. Koop kaorties, volk, en maek dit mit!


Muzikaole veurpremiere Sultan

Plaetst op 11 oktober 2026.

Ik hebbe vandemiddag mit een koppel volk een prachtige middag had in de Filmkarke van Steven de Jong in Hooltwoolde. Et Hollywood van de Stellingwarven. D’r is een protte ni’js over de film Sultan van Bercoop daor op 12 november de eerste veurstelling van is. De eerste tien veurstellings bin al uutverkocht. D’r bin now zes ni’je veurstellings an toevoegd en die beginnen ok al vol te lopen. De film wodt butendat nogal wat langer as dawwe eerst dochten. We gongen uut van een kotte film van 20 menuten tot goed een half ure. Mar… op een peer menuten nao wodt et een film van een ure. Dat is hiel mooi. In Hooltwoolde wodt de echte Stellingwarver versie vertoond, mar d’r komt ok een versie mit ondertitels. Ien van de omroepbaozen in Hilversum hadde belangstelling… En dan komt d’r ok nog een album mit filmmeziek en splinterni’je lieties in et Stellingwarfs die veur een pat in de film veurkommen. In de Filmkarke bin trouwens ok Sultan t-shirts te koop. Vandemiddag wodden de lieties uut de film zongen deur Karel Wilms, Karst Berkenbosch en Anne Dolstra. Et was spietig dat Lammy Bruyns d’r niet bi’j wezen kon, die was nog op vekaansie. En Jannes Scheltinga, de zanger en frontman van de Stellingwarver Boererockband Asbest, was d’r ok niet. Et bin trouwens hatstikke mooie lieties wodden en mooie meziek. Hiel medern allemaole. We kregen ok een filmpien te zien over et maeken van de film. Ik hebbe now dus al zien hoe as Siebren Hofstra (Bauke) op zien reesfiets in de sni’j in een sloot slichtvol waeter terechtekomt. An de podcasttaofel praotte Steven mit de zangers, mit Siebren en mit mi’j. Ik was in wezen stomverbaosd dat dit allemaole ontstaon is uut mien verhael Sultan in de bundel Naozoemerlaand. Mooi dat ik dit nog mitmaeken kan! Veur kaorten: zie de agenda van www.filmkerkwolvega.nl


Het laatste offer

Plaetst op 10 oktober 2026.

Vandemorgen he’k tussen de bujjen deur even op ‘e fiets naor de slaachter in Berkoop west. Ik moet wat fietsen blieven, dat kan ‘k nog hatstikke goed. Mar et lopen wodt wel wat minder. Vandemiddag he’k in klad een kollum schreven. Die za’k morgenvroeg veerder uutwarken.

Ik kreeg een schoffien leden drie Nederlaanse thrillers en ik hebbe ze now allemaole lezen. Uitglijder van Loes den Hollander vun ik niet vule an. Zeezicht van Linda van Rijn was al wat beter. Mar ik hebbe now Het laatste offer van Simone van der Vlugt lezen en dat vien ik echt een hatstikke mooi en spannend boek. Et is zuver wat Dan Brown-achtig! Et verhael gaot over Birgit, die Jef tegenkomt, him mit naor huus nemt en votdaolik twie wilde en enerverende naachten mit him beleeft. Zoks is vanzels mooi, mar dan is Jef inienend vot en te zuke. Ze vint him gelokkig weeromme. Et bliekt dat hi’j op ‘e vlocht is, zien leven niet zeker is. Zi’j helpt him en dan is zi’j heur leven ok niet meer zeker. Ze wo’n naozeten en d’r wodt perbeerd  heur van kaant te maeken. Et dot blieken dat Jef zien vader archeoloog is en in de tempel bi’j Luxor wat belangrieks ontdekt het. Birgit en Jef reizen naor Iegypte. Et mooie is dat ik allegeer bekende dingen las, want ik bin daor lange leden mit kammeraod Haarm west. Jef zien vader is de Ark van et Verbond op et spoor en het ontdekt dat die now beweerd wodt onder et labyrint in de Kattedraal van Chartres. Birgit en Jef reizen van Iegypte naor Chartres en dan wodt et hiel arg spannend. Een prachtig boek! Veur de lezers die niet weten wat de beroemde Ark van et Verbond is even een uutleg. Nao de uuttocht uut Iegypte kreeg Mozes van God op ‘e barg Horeb of Sinaï twie stienen plaeten mit de tien geboden d’r op. Die stienen plaeten kwammen in de Ark van et Verbond. Dat was een dreegber kissien van accaciahoolt daor goold overstreken was. De Ark wodde laeter beweerd in de tempel van Salomo. Et is niet bekend wat d’r in de loop van de ieuwen mit gebeurd is. Is et ooit vernietigd of is et argens aanders hennebrocht en verstopt? Betaot et nog? Laot je fantesie d’r mar op los en dat het Simone van der Vlugt daon deur d’r een prachtige thriller over te schrieven. Hieronder twie foto’s. Boven: et omslag van et boek. Onder: Mozes en de tafelen der wet, een schilderi’je van Rembrandt van Rijn uut 1659.



Ellendig rotweer

Plaetst op 9 oktober 2026.

Et is ellendig rotweer en toch mos ik d’r in et regenpak op ‘e fiets deurhenne. Die mos naemelik de dadde servicebeurt hebben, dat om negen ure wa’k vandemorgen al in Wolvege. Kil, wiend, regen… Thuus he’k de verwaarming veur et eerst weer an en ik hebbe de Duutse laekens al een peer daegen leden op bedde daon. Die vulen now een stok lekkerder an as die koolde ketoenen dingen. Op een lienfiets bin ‘k naor fysiosport west en vervolgens naor de biebeltheek. Ik hebbe et vierde diel van de Jakob Weber-reeks besteld. D’r bin nog 34 aandere lezers veur me. Dat duurt dus nog even. Een man zee daor tegen me dat hi’j geneuten hadde van de kollums in de kraante over mien aeventuren op et terras in Borger. Hi’j vun ze daor slimme klaantonvrundelik. Neffens him hebben ze et te goed. ‘As de tied mar es minder wodt en ze minder klaanten kriegen, dan zuj’ es zien hoe vlogge aj’ tomatesop in plak van mosterdsop bi’j een twaelfuurtien kriegen kunnen.’ Daor bin ‘k et hielemaole mit iens. Bi’j Jarmo he’k nog een koppien waarm drinken had en doe bin ‘k weer naor de fietseman gaon om mien fiets op te haelen. Deur regen en wiend bin ‘k weer thuuskommen.


Stil als de sneeuw

Plaetst op 8 oktober 2026.

Nao Iselin was bijna thuis en De nacht reist alleen he’k now et dadde diel van de Jakob Weber-reeks van de Noorse thrillerschriever Orjan Karlsson lezen. Een prachtige serie over pelisieinspekteur Jakob Weber en de jonge rechercheur Noora Yun Sande. Et vierde diel, Waar het licht verdwijnt, is in juni uutkommen. Dat za’k morgen drekt bestellen in de biebeltheek. Et dadde diel is al lieke spannend as de eerste beide dielen. Butendat is et aenlik ien lang verhael. In dit dadde diel wodt in Henningsvaer op ‘e Lofoten een dooie jonge vunnen op et voetbalveld. Et vriest dat et kraekt en de jonge het allienig mar wat dunne kleren an. Is et een ongelok of is d’r wat slimmers an de haand? Gao daor mar vanuut! In dezelde tied wodt in Bode et lichem van een man vunnen die hiele dure kleren an het. Hi’j ligt an de kaant van et waeter en liekt verdronken te wezen. Mar is dat wel zo? Reken daor mar niet op! D’r is dus wark an de winkel veur Jakob en Noora Yun. Et mooie is dat die alle moorden altied weer oplossen.


« Veurige bladziede   Volgende bladziede »